4-Тошкент халқаро инвестиция форумининг расмий очилиш маросими 10 июнь куни тушдан сўнг Tashkent City бизнес марказининг Конгресслар залида бошланди.
Очилиш маросимида фақат махсус таклиф этилган сиëсатчилар¸халқаро ташкилот ва йирик корпорациялар раҳбарларигина иштирок этди.
Уни Ўзбекистон президенти Шавкат Мирзиëев очиб берди.
Тошкент раҳбари очилиш маросимига таклиф қилинган инвесторларга мамлакатнинг инвестициялар учун очиқлиги¸ ўз ҳукумати инвесторлар ҳақ-ҳуқуқларини ҳимоя қилажагини яна бир бор ваъда қилди.
-Бир масалага алоҳида урғу бермоқчиман: биз учун инвестиция – фақатгина молиявий манба эмас. Бу – технология, билим, малакали кадрлар, халқаро ишлаб чиқариш занжирига қўшилиш, яъни, ҳақиқий тараққиёт демакдир.
Ўзбекистон мана шундай эзгу ғоялар билан келадиган хорижий инвесторларга барча шароитларни яратиб беради, уларни ҳар томонлама қўллаб-қувватлайди ва буни кафолатлайди.
Юртимизда сизлар учун барча эшиклар доимо очиқ.
Энг муҳими – фаолиятингизни ҳимоя қиладиган қонунлар бор, мулоқотга очиқ давлат ва ҳамкорликка тайёр меҳнаткаш халқимиз бор, деди Мирзиëев жумладан.
Шавкат Мирзиëевнинг ушбу нутқидан сўнг Тошкент халқаро инвестиция форумининг ялпи мажлиси бошланди.
Олдиндан тузилган дастурга кўра¸ ялпи мажлисга АҚШнинг CNN International телеканалининг таниқли бошловчиси Ричард Квест (Richard Quest) модераторлик қилиши белгиланган. CNN Business дастури муҳаррири бўлган Квест Тошкент халқаро инвестиция форумининг ўтган йилги ялпи мажлисига ҳам бошловчилик қилган.
Ялпи мажлис иштирокчиларининг Озодликка айтишича¸ Квест залда бўлишига қарамай¸ йиғинга модераторлик қилишни истамаган.
- Мен Квестнинг залга кирганини кўрдим. Аммо у модераторлик қилмади. Тушунишимча¸ Квест ялпи мажлисда сўзга чиқувчилар рўйхатига Россия Бош вазири ўринбосари¸ Газпромнинг ноижроия директори Александр Новак қўшилганига норозилик билдирган. Афтидан¸ унинг мажлисда Россия расмийси ҳам сўзга чиқишидан хабари бўлмаган.
Тошкент халқаро инвестиция форумининг президент Мирзиëев қатнашган ялпи мажлисида юзага чиққан бу воқеа¸ Европа дипломатларидан бирининг таъкидича¸ “сиëсий демарш” бўлган.
-Ялпи мажлисдаги нутқини Новак форум иштирокчиларига Владимир Путиннинг “алангали саломи”ни еткизиш билан бошлади. У сўз олиши билан АҚШ¸ аксар Европа Иттифоқи сиëсий ва бизнес намояндалари залдан намойишкорона чиқиб кетишди. Шахсан мен¸ АҚШ¸ Британия¸ Польша¸ Латвия ва Литва делегациялари вакилларининг туриб кетганини кўрдим. Камида 50 иштирокчи Россия расмийсининг форумдаги иштирокига ана шундай норозилик билдирди.
Ўзбекистон Инвестициялар¸ саноат ва савдо вазирлиги уюштираëтган Тошкент халқаро инвестиция форуми мажлислари вазирликнинг Youtube каналида жонли тарзда кўрсатилмоқда ва сайтга юкланмоқда. Аммо форумнинг расмий очилиш маросими ва сиëсий демарш рўй берган ялпи мажлиси видеоси жамоатчиликка тақдим этилмади.
Маълум бўлишича¸ Кремлнинг Украинага босқини бошланган 2022 йилдан бери Россия расмийлари Тошкент халқаро инвестиция форумида биринчи марта иштирок этмоқда.
Бу йилги форумда¸ расмий маълумотларга кўра¸ Александр Новакдан ташқари Россия Иқтисодий тараққиëт вазири Максим Решетников ва унинг ўринбосари Дмитрий Вольвачлар сўзга чиққан.
Президент матбуот хизматига кўра¸ 10 июнь куни форум очилиш маросими олдидан Россия Федерацияси Ҳукумати Раисининг ўринбосари Александр Новакни қабул қилган.
Форум